Heledd Fychan Canol De Cymru - South Wales Central

Mae llefarydd Plaid Cymru ar Ddiwylliant, Heledd Fychan AS, wedi beirniadu Llywodraeth y DU heddiw yn dilyn adroddiadau yn y cyfryngau bod cyhoeddiad yn yr arfaeth bod ffi trwydded y BBC ar fin cael ei rhewi am y ddwy flynedd nesaf.

Mae adroddiadau pellach yn awgrymu efallai mai hwn yw’r cyhoeddiad olaf o’i fath yn ymwneud â ffi trwydded y BBC ac y gallai’r model ariannu presennol gael ei ddileu’n gyfan gwbl ar ôl 2027.

Cyhuddodd Heledd Fychan MS y Prif Weinidog Boris Johnson o ddefnyddio “tacteg dargyfeiro sylw” o geisio plesio rhai carfannau yn ei blaid mewn wythnos drychinebus i’r Ceidwadwyr.

Ailadroddodd AS Plaid Cymru alwad ei phlaid am ddatganoli darlledu’n llawn i Gymru er mwyn diogelu dyfodol S4C gan fod ei chyllid ar fin dod yn gyfan gwbl o ffi’r drwydded.

Dywedodd Heledd Fychan MS:

“Bydd adroddiadau am rewi ffi trwydded y BBC am ddwy flynedd yn achosi ansicrwydd mawr i ddyfodol y cyfryngau Cymreig, yn enwedig ein sianel genedlaethol S4C sydd ar fin cael ei hariannu’n gyfan gwbl o ffi’r drwydded.

“Mae hyn yn teimlo’n debyg iawn i dactegau dargyfeirio sylw gan Brif Weinidog anobeithiol sy’n ceisio plesio rhai carfannau yn ei blaid yn dilyn wythnos drychinebus i’r Ceidwadwyr. 

“Mae Llywodraeth y DU yn dangos gelyniaeth gynyddol tuag at y BBC tra ar yr un pryd, mae allbwn newyddion lleol yn prinhau. Mae hyn yn gwneud Cymru yn neilltuol o agored i’r diffyg yn y cyfryngau sy'n niweidio ein democratiaeth.

“Dyna pam mae Plaid Cymru yn galw am ddatganoli darlledu ar unwaith fel nad yw dyfodol S4C a BBC Cymru bellach yn nwylo llywodraeth Dorïaidd sydd yn gwbl ddiglem pan ddaw’n fater o warchod darpariaeth cyfryngau unigryw ein cenedl.

“Gyda sôn pellach am ffi’r drwydded yn cael ei dileu’n gyfan gwbl ar ôl 2027, rwy’n annog Llywodraeth Cymru i weithredu nawr i sicrhau nad yw ein cyfryngau cenedlaethol yn cael eu dal mewn ras i’r gwaelod lle mae elw yn trechu darpariaeth o safon.”