Heledd Fychan Pontypridd Cynon Merthyr

Hoffwn rannu fy nheyrnged yn y Senedd heddiw i Kyle Sieniawski o Bontypridd a fu farw’n drasig ddiwedd mis Tachwedd yn bedair ar ddeg oed, ar ôl derbyn diagnosis dinistriol o Glefyd Niwronau Motor yn gynharach eleni.

Roedd Kyle yn fachgen hyfryd, gofalgar ac ysbrydoledig a gafodd ei gymryd yn llawer rhy gynnar. Er gwaethaf y gofal gwych a gafodd yn yr ysbyty, roedd Kyle eisiau dod adref.  Gwnaeth ei deulu bopeth posibl i geisio gwneud i hyn yn bosib, hyd yn oed rhoi eu cartref ar y farchnad gan nad oedd yn addas ar gyfer addasiadau.  Yn anffodus, ni chafodd ei ddymuniad erioed ond mae ei deulu wedi addo parhau i ymgyrchu er cof am Kyle i sicrhau nad oes rhaid i unrhyw deulu fynd trwy’r hyn a wnaethant.

Ymunodd y Senedd â mi i anfon ein cydymdeimlad dwysaf at Mark, Melanie, Liam a holl deulu a ffrindiau Kyle. Ni fydd byth yn cael ei anghofio gan bawb a gyfarfu ag ef neu a gafodd eu cyffwrdd gan ei stori.  Gallwch ddarllen y deyrnged lawn yma: https://record.senedd.wales/Plenary/15469#C730876

Byddaf yn parhau i gefnogi teulu Kyle ac eraill i bwyso ar Lywodraeth Cymru i wneud rhagor o waith gydag awdurdodau lleol i wella llwybrau a phenderfyniadau yn sylweddol o ran argaeledd cartrefi wedi'u haddasu i bobl sydd wedi cael diagnosis o glefyd niwronau motor a chyflyrau iechyd tebyg.

Mae angen systemau ymateb llawer gwell arnom i unigolion a'u teuluoedd.  Mae Adroddiad "Datgloi'r Drws" Cymdeithas y Clefyd Niwronau Motor: https://www.mndassociation.org/unlockthedoor yn edrych ar gamau penodol gan gynnwys cyflwyno prosesau llwybr cyflym ffurfiol i bobl â chyflyrau cynyddol fel clefyd niwronau modur i sicrhau bod penderfyniadau'n cael eu gwneud a'u darparu'n gyflym, gyda chefnogaeth hyfforddiant ac addysg i staff fel bod llwybr cyflym yn cael ei gymhwyso'n gyson ac yn briodol.  Mae'r math hwn o ymateb yn hanfodol i sicrhau nad oes unrhyw deulu arall yn dioddef yr hyn y bu'n rhaid i Kyle a'i deulu ei ddioddef.