Heledd Fychan Pontypridd Cynon Merthyr

Yn wythnosau olaf y Chweched Senedd, sefais mewn undod ag ymwelwyr iechyd Cwm Taf Morgannwg, fu ar streic ers dechrau mis Mawrth. Cefais hefyd holi’r Prif Weinidog ar y mater, gan annog Llywodraeth Cymru i ymyrryd. Maent yn haeddu tâl teg sy’n adlewyrchu eu cymwysterau, eu cyfrifoldebau a’u statws proffesiynol.

Mae’r rhain i gyd yn fenywod ac yn gweithio mewn rhai o’r cymunedau mwyaf difreintiedig yng Nghymru, gan ddarparu gwasanaethau iechyd cyhoeddus hanfodol a chefnogi plant a’u teuluoedd. Mae angen iddynt gael eu gwobrwyo’n gywir am y gwaith y maent yn ei wneud, ond maent yn cael eu gwrthod gan fwrdd iechyd nad yw’n fodlon gweithredu’r hyn sydd eisoes wedi’i gytuno.

Maent wedi dangos gwydnwch anhygoel am ymhell dros ddwy flynedd, ac wedi’u gorfodi i fynd i bleidlais arall i streicio am ail fis.

Rhaid i’r bwrdd iechyd gyflawni ymrwymiadau blaenorol, ac os na wnaiff hynny, rhaid i Lywodraeth Cymru gymryd camau. Dylai partneriaeth gymdeithasol fod yn ystyrlon.