Heledd Fychan Canol De Cymru - South Wales Central

Bydd toriadau yn cael effaith “anghymesur” ar Gymru – Heledd Fychan

Mae Plaid Cymru wedi galw am ddadl frys yn y Senedd ar ôl i Ganghellor Llafur y DU gyhoeddi biliynau mewn toriadau lles.

Dywedodd llefarydd cyllid Plaid Cymru, Heledd Fychan, fod yn rhaid i’r Prif Weinidog Eluned Morgan “nodi ar fyrder” sut y bydd yn amddiffyn Cymru rhag y toriadau a wnaed i les gan ei chydweithwyr Llafur.

Dywedodd Plaid Cymru y byddai Cymru’n cael ei heffeithio fwyfwy gan y toriadau, gan fod gan y wlad gyfraddau uwch o bobl anabl o oedran gweithio na chyfartaledd y DU a rhai o’r lefelau uchaf o anweithgarwch economaidd oherwydd salwch tymor hir.

Gan gyhuddo Llafur o dargedu’r “mwyaf bregus” yn hytrach na threthu’r “hynod gyfoethog”, dywedodd Ms Fychan na allai’r Prif Weinidog Llafur “aros yn dawel” a gofynnodd iddi amlinellu pa fesurau lliniaru yr oedd ei llywodraeth wedi’u rhoi ar waith ochr yn ochr ag unrhyw sylwadau brys a wnaed i “amddiffyn pobol Cymru”.

Dywedodd llefarydd Plaid Cymru ar gyllid, Heledd Fychan AS,

“Does dim amheuaeth bod cyhoeddiad heddiw gan Lywodraeth Lafur y DU yn nodi parhad o lymder.

“Yn hytrach na threthu’r cyfoethog iawn, mae Llafur wedi dewis targedu’r rhai mwyaf bregus, gan orfodi toriadau lles dyfnach fyth a fydd yn gyrru tlodi ac anghydraddoldeb yng Nghymru—gan danseilio’r union dwf economaidd y maent yn honni ei fod yn ei gefnogi.

“O ystyried maint y toriadau hyn a’u heffaith ar ein cymunedau, mae dadl frys yn ystod amser y llywodraeth yr wythnos nesaf yn hanfodol. Rhaid i Brif Weinidog Llafur egluro ar fyrder sut y bydd yn amddiffyn Cymru rhag canlyniadau dinistriol penderfyniadau ei phlaid ei hun.

“Bydd Cymru’n cael ei heffeithio’n anghymesur, gyda chyfraddau uwch o bobl anabl o oedran gweithio na chyfartaledd y DU a rhai o’r lefelau uchaf o anweithgarwch economaidd oherwydd salwch hirdymor.

"Ni all y Prif Weinidog aros yn dawel tra bod ei phlaid yn San Steffan yn gorfodi’r toriadau creulon hyn. Os yw’r ‘bartneriaeth mewn grym’ bondigrybwyll rhwng y ddwy lywodraeth i olygu unrhyw beth, rhaid iddi ateb: Beth oedd hi’n ei wybod am y toriadau hyn cyn heddiw? Pa fesurau lliniaru, os o gwbl, y mae ei llywodraeth wedi’u rhoi ar waith? A pha sylwadau brys y mae wedi’u gwneud i Lywodraeth y DU i amddiffyn pobl Cymru?"