Heledd Fychan Canol De Cymru - South Wales Central

Heddiw, mae Llefarydd Plaid Cymru dros Blant a Phobl Ifanc, Heledd Fychan AS, wedi galw am Adolygiad Cyflym o anghydraddoldebau o fewn y system addysg yng Nghymru.

Daw ei galwad wrth i ymchwil newydd gan y Sefydliad Polisi Addysg ddangos fod disgyblion o gefndiroedd difreintiedig tua dwy flynedd y tu ol i'w cyfoedion. 

Dywedodd Heledd Fychan AS fod angen mynd i'r afael a'r broblem ar fyrder o ystyried y bydd yr argyfwng costau byw yn dwysau'r broblem dros y misoedd a'r blynyddoedd nesaf.

Meddai Heledd Fychan AS:

"Mae’r canfyddiadau hyn yn peri cryn bryder ac yn dangos bod llawer o waith i’w wneud eto o ran cau’r bwlch cyrhaeddiad yng Nghymru. 

Dyma pam mae Plaid Cymru wedi rhoi blaenoriaeth i fynd i’r afael â thlodi plant fel rhan o’r Cytundeb Cydweithio â Llywodraeth Cymru, gan fynd i’r afael â gwraidd yr hyn sy’n achosi anghydraddoldeb ymhlith disgyblion yn y lle cyntaf. 

Rhaid i Lywodraeth Cymru ymateb ar frys gan y bydd y broblem yn gwaethygu yn sgil yr argyfwng costau byw. 

Dylai’r Gweinidog Addysg ystyried cynnal Adolygiad Cyflym er mwyn deall pam fod y sefyllfa yng Nghymru mor siomedig ac adrodd ar gyfres o argymhellion ystyrlon cyn dechrau tymor yr hydref. 

Fel bob amser, mae Plaid Cymru yn barod i chwarae ei rhan i gydweithio ar y mater hwn, yn union fel yr ydym wedi’i wneud drwy sicrhau prydau ysgol am ddim i bob disgybl cynradd a gofal plant am ddim o 2 flwydd oed.”