Heledd Fychan Canol De Cymru - South Wales Central

Wythnos yma oedd ein wythnos olaf yn siambr y Senedd tan fis Medi.

Roedd yn wythnos brysur, a thanllyd ar adegau, yn bennaf wrth imi a fy nghyd-aelodau o Blaid Cymru geisio cael atebion gan y Llywodraeth ar nifer o faterion o bwys cyn i’r toriad ddechrau.

Un o’r materion hynny oedd bwyd dros y gwyliau ysgol ar gyfer plant a phobl Ifanc sy’n gymwys ar gyfer derbyn brydau ysgol am ddim. Dros y blynyddoedd diwethaf, mae Llywodraeth Cymru wedi darparu bwyd i’r plant a’r pobl Ifanc yma ond yn anffodus, does dim darpariaeth am yr haf. Er bod disgwyl i rai o’r cynlluniau y byddant y neu rhedeg – megis rhaglen Bwyd a Hwyl ('Bwyd a Hwyl' Rhaglen Gwella Gwyliau’r Haf (SHEP) - CLILC (wlga.cymru) – gyrraedd tua 30,000 o blant – a rhaglen arall gyraedd tua 10,000 o blant- bydd bwlch enfawr, gan bod oddeutu 92,000 o ddisgyblion rhwng 5 a 15 oed yn gymwys am brydau ysgol am ddim. Mae hwn yn fwlch felly o 52,000 o ddisgyblion sydd mewn perygl felly o lwgu’r haf hwn.

Mae nifer o fanciau bwyd lleol ac elusennau yn bryderus dros ben, gan nad yw’r Llywodraeth wedi cyfathrebu hyn iddynt na rhoi cynllun ar waith o ran sut mae sicrhau bod bwyd ar gael, a hefyd bod teuluoedd yn gwybod sut mae cael mynediad ato.  Byddaf yn parhau i geisio cael eglurder ar fyrder.  

Rwyf yn eithriadol o falch fod Plaid Cymru drwy’r Cytundeb Cydweithio wedi llwyddo i sicrhau cinio ysgol am ddim i bob plentyn oed cynradd yn ystod y tymor, yn arbennig wedi i’r Blaid Lafur bleidleisio dro ar ol tro i wrthod hyn. Rhaid rwan blaenoriaethu ymestyn hyn i bob gwyliau ysgol a hefyd i ysgolion uwchradd.

Felly, er nad yw’r Senedd yn eistedd, mae digon o waith i’w wneud dros yr wythnosau a’r misoedd nesaf. Rwyf yn edrych ymlaen i ymweld gyda llwyth o brosiectau a grwpiau cymunedol lleol, ynghyd a sefydliadau cenedlaethol. Byddaf hefyd yn cael peth amser ffwrdd gyda fy nheulu, ond bydd aelodau o fy nhim yn parhau i fod ar gael yn ystod y cyfnod hwnnw i helpu unrhyw un sydd angen cefnogaeth.

Os oes prosiect yr hoffech imi ymwled gyda, neu os ydych eisiau cymorth, plis dewch i gysylltiad drwy ebostio [email protected] neu ffonio 01443 853214