Heledd Fychan Canol De Cymru - South Wales Central

Roedd mis Chwefror yn nodi pum mlynedd ers i Storm Dennis ddinistrio cartrefi a busnesau ledled De Cymru. Ers hynny, mae llawer o bobl wedi dioddef llifogydd dilynol ac yn parhau i fyw dan fygythiad parhaus. Mae angen gwneud mwy, a llawer yn gyflymach, i gefnogi cymunedau sydd bellach yn byw mewn ofn bob tro y mae'n bwrw glaw yn drwm.

Ar ben-blwydd Storm Dennis, trefnais ddigwyddiad ym Mhontypridd i drafod beth sydd wedi digwydd ers 2020 a beth sydd angen ei wneud o hyd. Daeth y digwyddiad â chynrychiolwyr ynghyd o Gyngor RhCT, Cyfoeth Naturiol Cymru (CNC), Dŵr Cymru, a’r Groes Goch Brydeinig i drafod cynnydd a chynlluniau ar gyfer y dyfodol. Yn bwysicaf oll, fe wnaethom wrando ar drigolion a chymunedau sy’n byw gyda’r perygl parhaus o lifogydd.

Mae fy nhîm a minnau yn parhau mewn cysylltiad â’r rhai sydd angen cymorth pellach. Ar hyn o bryd rydym yn llunio rhestr o bobl y gwrthodwyd llifddorau iddynt yn flaenorol ond sydd bellach eu hangen. Rwy’n annog unrhyw un sydd heb gysylltu eto ond sydd angen cefnogaeth i estyn allan.