Mae Heledd Fychan wedi anfon neges o gefnogaeth i dîm pêl-droed merched Cymru wrth iddynt fynd i'r Swistir ar gyfer eu twrnament rhyngwladol mawr cyntaf.
O 2 Gorffennaf i 27 Gorffennaf, bydd y tîm yn cystadlu yn twrnament Ewro Merched UEFA, gan wynebu 16 tîm ar draws wyth lleoliad gwahanol yn y Swistir. Mae'r twrnament yn nodi carreg filltir hanesyddol wrth i ferched Cymru fynd ar y llwyfan rhyngwladol am y tro cyntaf.
Dywedodd llefarydd Plaid Cymru dros chwaraeon, Heledd Fychan AS,
"Ar ran Plaid Cymru, dymunaf y gorau i dîm merched Cymru wrth iddynt gynrychioli ein cenedl yn eu twrnament mawr cyntaf erioed.
“Mae'r foment hanesyddol hon yn dyst i gryfder anhygoel y tîm, ac i gryfder cynyddol pêl-droed merched yng Nghymru. Mae'n dangos beth all gael ei gyflawni pan gaiff talent ei feithrin ac uchelgais ei gefnogi - rhywbeth y mae Plaid Cymru yn credu y dylai fod wrth wraidd ein gweledigaeth genedlaethol.
“Wrth iddyn nhw wisgo’r ddraig goch gyda balchder, maen nhw’n cario gobeithion Cymru hyderus ac uchelgeisiol sy’n barod i gymryd ei lle ar lwyfan y byd.
Rydym yn falch ohonyn nhw, rydym yn credu ynddyn nhw, a byddwn yn eu cefnogi bob cam o’r ffordd. Amdani ferched!"
Dangos 1 ymateb
Mewngofnodi gyda
Mewngofnodi gyda Facebook Mewngofnodi gyda Twitter